Eirberg innkallar FFP2 andlitsgrímur

Vöruheiti: FFP2 ANDLITSGRÍMUR – 2 stk. í pakka

Framleiðandi: Zhejiang Kaiqi Environmental Protection Technology Co, Ltd.

Sem hluti af samstarfsverkefni eftirlitsstjórnvalda á sviði vöruöryggis innan Evrópu fékk Vinnueftirlitið sýnishorn af FFP2 andlitsgrímum í verslun Eirbergs og sendi til rannsóknar hjá Force Technology löggildri prófunarstofu í Danmörku.

Niðurstöður þessara prófana eru að andlitsgrímurnar stóðust ekki kröfur sem gerðar eru til slíkra persónuhlífa sem uppfylla eiga staðlana FFP2 EN149:2001+A1:2009. Samkvæmt prófununum veita andlitsgrímurnar því neytendum ekki það öryggi sem ætlast er til. Þegar Eirbergi voru kynntar ofangreindar niðurstöður tók fyrirtækið umræddar andlitsgrímur þá þegar úr sölu.

Eirberg og Vinnueftirlitið beina þeim tilmælum til þeirra sem eiga ofangreindar andlitsgrímur að hætta notkun þeirra og skila þeim til Eirbergs þar sem varan var keypt eða henda þeim ella.

Tekið skal fram að Eirberg ehf. keypti umrædda vöru frá traustum aðila í góðri trú um að hún uppfyllti nauðsynlega staðla og harmar að svo virðist ekki vera raunin. Beðist er velvirðingar á óþægindum sem þetta kann að valda.